សូមជ្រះថ្លាអនុមោទនា បុណ្យវិសាខបូជា ជាបុណ្យកតញ្ញូចំពោះព្រះពុទ្ធ ដែលជាព្រះបិតាវិវដ្តៈ ជាថ្ងៃទ្រង់ប្រសូតិ ថ្ងៃទ្រង់ត្រាស់ដឹង និងថ្ងៃទ្រង់ចូលបរិនិព្វាន យើងទាំងអស់គ្នាជាសាវ័ក ជាពុទ្ធបរិស័ទរបស់ព្រះអង្គ ត្រូវមានកតញ្ញូចំពោះព្រះអង្គឱ្យក្រៃលែងបំផុត បើខ្វះធម៌កតញ្ញូ យើងក្លាយជាបុគ្គលគ្មានគុណធម៌ ប្រៀបដូចភាជនៈផ្កាប់ស្ងួតទទេ ដែលគ្មានទឹកតិចតួចឡើយ ព្រះអង្គសំដែងថា កតញ្ញូជាប្រធាននៃបារមីទាំងឡាយ ជាកំពូលនៃគុណធម៌ដែល ខ្ពង់ខ្ពស់ អស្ចារ្យ ក្រៃលែងបំផុត ក្នុងលោកនេះ ។ព្រះអង្គបានបញ្ជាក់ថា កតញ្ញូតាសមំ នត្ថិ តិវិធំ ឧត្តមំ វរំ (បុណ្យនិង សេចក្តីសុខ) ប្រៀបស្មើដោយកតញ្ញូតាធម៌ មិនមានឡើយ ធម៌កតញ្ញូនេះ មានគុណានុភាព ខ្ពង់ខ្ពស់ បំផុតក្នុងលោក។បុគ្គលណាបានបំពេញកតញ្ញូចំពោះព្រះអង្គ ហើយរមែងមានតេជះរុងរឿង អស្ចារ្យបំផុត ក្នុងចំណោមជនទាំងឡាយ ដ៏ច្រើនក្នុងលោកនេះ។
ភិក្ខុធម្មត្ថេរោ
🙏🏻🪷🪷🪷🪷🪷🙏🏻

៚ បុណ្យ«វិសាខបូជា»ធ្វើឡើងដើម្បីរំឭកដល់ថ្ងៃនក្ខត្តឫក្សទាំង៧ប្រការគឺ៖

៚ ថ្ងៃមហានក្ខត្តឫក្សទី១ ថ្ងៃដែលសុមេធបណ្ឌិតព្រះពោធិសត្វបានទទួល ព្រះពុទ្ធទ្រង់ព្យាករណ៍អំពីសំណាក់ ព្រះពុទ្ធទ្រង់ព្រះនាមទីបង្ករថា សុមេធតាបសនេះ និងបានត្រាស់ជាព្រះពុទ្ធមួយព្រះអង្គព្រះនាមសមណគោត្តមនា អនាគតកាល នៅថ្ងៃ ១៥ កើតពេញបូណ៌មី ខែពិសាខ ។
៚ ថ្ងៃមហានក្ខត្តឫក្សទី២ ថ្ងៃដែលព្រះបរមពោធិសត្វទ្រង់ ប្រសូត្រចាក់ព្រះគភ៌នៃព្រះរាជមាតា ក្នុងឧទ្យានលុម្ពិនី ក្រោមដើមសាលព្រឹក្សទាំងគូវេលាថ្ងៃត្រង់ចន្លោះនៃនគរទាំងពីរគឺ នគរកបិលវត្ថុ និងនគរទេវទហៈ នៅថ្ងៃសុក្រ ១៥ កើត ពេញបូណ៌មីខែពិសាខ ឆ្នាំច ។
៚ ថ្ងៃមហានក្ខត្តឫក្សទី៣ ថ្ងៃដែលព្រះស្រីមហាពោធិព្រឹក្សជា សហជាតវត្ថុដុះឡើងដំណាលគ្នានឹងព្រះអង្គទ្រង់ប្រសូត្រ ដើម្បីជំនួយឲ្យចិត្តបរិស័ទជ្រះថ្លា នៅថ្ងៃសុក្រ ១៥ កើត ពេញបូណ៌មី ខែពិសាខ ឆ្នាំច ។
៚ ថ្ងៃមហានក្ខត្តឫក្សទី៤ ថ្ងៃដែលបរមពោធិសត្វទ្រង់ត្រាស់ដឹងនូវអនុត្តរសម្មាសម្ពុទ្ធិញ្ញាណ នាមណ្ឌលគល់ពោធិព្រឹក្ស វេលាប៉ែកបច្ចសម័យ នៅថ្ងៃពុធ ១៥កើត ពេញបូណ៌មី ខែពិសាខ ឆ្នាំរកា ។
៚ ថ្ងៃមហានក្ខត្តឫក្សទី៥ ថ្ងៃដែលព្រះសម្មាសម្ពុទ្ធិញ្ញាណ ស្តេចយាងចូលនិព្វាន នាទីក្រុងកុសិនារារាជធានីបុរីរម្យ ដើមសាលព្រឹក្ស ទាំងគូ វេលាប៉ែកបច្ចសម័យ នៅថ្ងៃអង្គារ ១៥ កើត ពេញបូណ៌មី ខែពិសាខ ឆ្នាំម្សាញ់ ។
៚ ថ្ងៃមហានក្ខត្តឫក្សទី៦ ថ្ងៃប្រល័យព្រះធាតុ ឬឱ្យឈ្មោះថា ធាតុបរិនិព្វាន ពេលព្រះពុទ្ធសាសនាគ្រប់ចំនួន ៥០០០ ព្រះវស្សាហើយ ព្រះអដ្ឋិធាតុទាំងអស់ហោះមកនាមណ្ឌល គល់ពោធិព្រឹក្សផ្ដុំបានជារូបព្រះពុទ្ធគង់នៅបាន៧ថ្ងៃហើយក៏ បរិនិព្វានទៅ ឲ្យឈ្មោះថានិព្វានធាតុ នៅថ្ងៃពុធ ១៥ កើត ពេញបូណ៌មី ខែពិសាខ ឆ្នាំជូត ។
៚ ថ្ងៃមហានក្ខត្តឫក្សទី៧ ថ្ងៃជោគជ័យពុទ្ធាថ្ងៃព្រះភគវាគ្រប់ ព្រះអង្គបានត្រាស់ដឹងឡើងក្នុងលោកយើងនេះ នាថ្ងៃពុធ ១៥ កើត ពេញបូណ៌មី ខែពិសាខ ឆ្នាំរកា។

🙏🏻🪷🪷🪷🪷🪷🙏🏻