ALS បណ្តាយពិភពលោក @$$$$$$$

ឆន្ទៈគ្មានព្រំដែន៖ លោក ទីវ តារារិទ្ធិ បញ្ចប់បេសកកម្មជិះកង់ ៦ម៉ឺនគីឡូម៉ែត្រ ត្រឡប់មកមាតុភូមិវិញដើម្បីបន្តក្តីសង្ឃឹមឱ្យកុមារកម្ពុជា
បន្ទាប់ពីការតស៊ូយ៉ាងអង់អាចអស់រយៈពេល ២ឆ្នាំ នៅលើខ្នងកង់ឆ្លងកាត់ទ្វីបអាស៊ី អឺរ៉ុប និងអាហ្រ្វិកខាងត្បូង លោក ទីវ តារារិទ្ធិ អ្នកជិះកង់ផ្សងព្រេងវ័យ ៣៦ឆ្នាំ បានធ្វើមាតុភូមិនិវត្តន៍មកដល់កម្ពុជាវិញហើយ កាលពីថ្ងៃទី២២ ខែមិថុនា ឆ្នាំ២០២៦។
បេសកកម្មដ៏អស្ចារ្យសម្រាប់កុមារ
លោក ទីវ តារារិទ្ធិ បានចាប់ផ្ដើមបេសកកម្មមនុស្សធម៌នេះ កាលពីថ្ងៃទី៦ ខែមិថុនា ឆ្នាំ២០២៤ ដោយចេញដំណើរពីមន្ទីរពេទ្យកុមារអង្គរ ខេត្តសៀមរាប។ ក្នុងរយៈពេល ២ឆ្នាំកន្លងមកនេះ លោកបានជម្នះឧបសគ្គគ្រប់បែបយ៉ាង ដោយជិះកង់ឆ្លងកាត់ប្រទេសចំនួន ៤០ លើចម្ងាយផ្លូវជាង ៦ម៉ឺនគីឡូម៉ែត្រ ដើម្បីតែគោលដៅតែមួយគត់ គឺការរៃអង្គាសថវិកាជួយដល់មន្ទីរពេទ្យគន្ធបុប្ផា និងមន្ទីរពេទ្យកុមារអង្គរ។
ការតស៊ូដែលមិនទាន់បញ្ចប់
ទោះបីជាការធ្វើដំណើរដ៏វែងឆ្ងាយបានបញ្ចប់នៅក្រៅប្រទេសក៏ដោយ ប៉ុន្តែបេសកកម្មសម្រាប់កុមារនៅមិនទាន់ឈានដល់គោលដៅចុងក្រោយនៅឡើយទេ។ យោងតាមការបញ្ជាក់របស់លោក ទីវ តារារិទ្ធិ ការរៃអង្គាសថវិកានេះគឺខ្វះ ៣ម៉ឺនដុល្លារទៀត ទើបគ្រប់ចំនួន ២៥ម៉ឺនដុល្លារ ដែលជាគោលដៅនៃបេសកកម្មរបស់លោក។
ដើម្បីសម្រេចក្តីសុបិននេះ លោក ទីវ តារារិទ្ធិ បានបង្ហាញការប្តេជ្ញាចិត្តដ៏មុតមាំដោយនឹងបន្តជិះកង់ពីភ្នំពេញទៅកាន់ខេត្តសៀមរាប ដើម្បីបំពេញថវិកាឱ្យគ្រប់ ២៥ម៉ឺនដុល្លារ សម្រាប់ជួយសង្គ្រោះជីវិតកុមារកម្ពុជា។
ទឹកចិត្តដ៏ប្រពៃ និងការលះបង់របស់លោក ទីវ តារារិទ្ធិ គឺជាគំរូដ៏ល្អសម្រាប់យុវជនជំនាន់ក្រោយ និងបង្ហាញពីកម្លាំងនៃសាមគ្គីភាពក្នុងការកសាងក្តីសង្ឃឹមជូនដល់កុមារដែលកំពុងត្រូវការជំនួយ។

អត្ថបទដោយ: Norn SR Vlog