លោក អ៊ុច បូររិទ្ធ អនុប្រធានទី១ ព្រឹទ្ធសភាបានលើកឡើងថា បន្ទាប់ពីមានកិច្ចព្រមព្រៀងបទឈប់បាញ់រវាងកម្ពុជា-ថៃ ដែលបានចុះហត្ថលេខារួមគ្នានៅថ្ងៃទី២៧ ខែធ្នូ ឆ្នាំ២០២៥ កម្ពុជាបានគោរពយ៉ាងពេញលេញនូវការប្តេជ្ញាចិត្តដែលខ្លួនបានសន្យា និងបានផ្តល់អាទិភាពជានិច្ចដល់ការអត់ធ្មត់ កិច្ចសន្ទនា និងកាត់បន្ថយភាពតានតឹង។ យ៉ាងណាមិញ ជាអកុសលឆន្ទៈក្នុងការបន្ធូរបន្ថយភាពតានតឹងនេះ ពុំទទួលបានការឆ្លើយតបក្នុងស្មារតីដូចគ្នានោះឡើយ ដោយសារកងកម្លាំងថៃបានបន្តសកម្មភាពជាឯកតោភាគី នៅក្នុងតំបន់ដែលស្ថិតក្នុងដែនអធិបតេយ្យភាពរបស់កម្ពុជា។ លោកបានថ្លែងដូច្នេះនៅក្នុងកិច្ចប្រជុំគណៈកម្មាធិការប្រតិបត្តិនៃសភាប្រើភាសាបារាំង នៅវិមាន Verre Paul Biya (រដ្ឋសភា) នៃប្រទេសកាមេរូន កាលពីថ្ងៃទី៧ ខែកក្កដា ឆ្នាំ២០២៦។

អនុប្រធានទី១ព្រឹទ្ធសភាកម្ពុជាបានបន្ដថា ទន្ទឹមនឹងស្ថិតក្នុងទឹកដីខ្មែរដោយខុសច្បាប់ហើយ យោធាថៃ ក៏បានឈូសឆាយដី ដំឡើងលួសបន្លា និងដាក់ទូរកុងតឺន័រ ឡោមព័ទ្ធភូមិប្រជាពលរដ្ឋខ្មែរ ពង្រឹងទីតាំងយោធា សាងសង់ហេដ្ឋារចនាសម្ព័ន្ធអចិន្រ្តៃយ៍ រៀបចំពិធីសាសនានៅតាមប្រាសាទដែលជាបេតិកភណ្ឌវប្បធម៌និងសាសនាកម្ពុជា ព្រមទាំងបំផ្លាញ និងជំនួសរូបសំណាកសាសនាផ្សេងៗទៀត ទោះបីកម្ពុជាបានតវ៉ាជាផ្លូវការម្តងហើយម្តងទៀត ក៏ពួកគេនៅតែបន្ត។

លោក អ៊ុច បូររិទ្ធ ក៏បានសម្តែងនូវការអរគុណផងដែរ ចំពោះសមាជិក សមាជិកានៃគណៈកម្មការនយោបាយសភាប្រើភាសាបារាំង(APF) ដែលនៅអំឡុងពេលកិច្ចប្រជុំគណៈកម្មការនយោបាយនៅខេត្តសៀមរាប កាលពីខែឧសភាកន្លងទៅ បានឃើញដោយផ្ទាល់ពីទំហំនៃការបំផ្លិចបំផ្លាញ ភស្តុតាងនៃការរំលោភបំពានជាក់ស្តែង និងទុក្ខវេទនារបស់ប្រជាជនភៀសសឹក និងបានអនុម័តជាឯកច្ឆន្ទនូវសេចក្តីសម្រេចចិត្ត ដោយអះអាងសាជាថ្មីពីសារៈសំខាន់នៃការគោរពអធិបតេយ្យនិងបូរណភាពទឹកដីនៃព្រះរាជាណាចក្រកម្ពុជា៕ ដោយ៖ថា ចាន់ធី