ខឹងសុំលុយម្តាយមិនបាន យុវជនម្នាក់ត្រូវបានឃាត់ខ្លួន ក្រោយវាយម្តាយរងរបួសធ្ងន់

កំពង់ស្ពឺ៖ ករណីហិង្សាក្នុងគ្រួសារមួយបានកើតឡើងនៅស្រុកសាមគ្គីមុនីជ័យ ខេត្តកំពង់ស្ពឺ កាលពីថ្ងៃទី១៥ ខែកញ្ញា ឆ្នាំ២០២៦ បន្ទាប់ពីយុវជនម្នាក់ត្រូវបានរាយការណ៍ថា បានប្រើហិង្សាលើម្តាយបង្កើតរបស់ខ្លួន បណ្តាលឱ្យរងរបួសក្បាល។

តាមសមត្ថកិច្ចបានឱ្យដឹងថា ជនសង្ស័យឈ្មោះ ឡុំ វុទ្ធិ ភេទប្រុស អាយុ២៦ឆ្នាំ រស់នៅភូមិពីងពង់ ឃុំដំណាក់រាំង ស្រុកសាមគ្គីមុនីជ័យ ត្រូវបានចោទថា បានវាយម្តាយឈ្មោះ ឡេង ម៉ាក់ អាយុ៧០ឆ្នាំ ចំនួន៤ដៃ មុនពេលយករនាស់ដែកវាយបន្ថែម បណ្តាលឱ្យបែកក្បាលផ្នែកខាងមុខ និងរងរបួសធ្ងន់។

ហេតុការណ៍នេះត្រូវបានរាយការណ៍ថា កើតឡើងបន្ទាប់ពីមានការខឹងសម្បារ ពាក់ព័ន្ធនឹងការសុំលុយពីម្តាយមិនបាន។

ក្រោយទទួលបានព័ត៌មាន កម្លាំងនគរបាលស្រុកសាមគ្គីមុនីជ័យ បានចុះអន្តរាគមន៍ និងឃាត់ខ្លួនជនសង្ស័យនៅកន្លែងកើតហេតុ ដើម្បីអនុវត្តតាមនីតិវិធីច្បាប់។

បច្ចុប្បន្ន សមត្ថកិច្ចជំនាញកំពុងកសាងសំណុំរឿង និងចាត់ការតាមនីតិវិធីច្បាប់ជាបន្តទៀត។