នៅព្រឹកថ្ងៃសុក្រ ទី២៦ ខែមិថុនា ឆ្នាំ២០២៦ លោក ឈុន ដារ៉ាត់ នាយកសាខាកាកបាទក្រហមកម្ពុជា ខេត្តក្រចេះ រួមជាមួយ លោកស្រី អ៊ុក ស៊ីវន្ថា នាយិការងសាខា បានដឹកនាំមន្រ្តីក្រុមប្រតិបត្តិសាខាកាកបាទក្រហមកម្ពុជា ខេត្តក្រចេះ ចូលរួមស្តាប់បាឋកថាស្តីពី «គុណធម៌ និងចរិយាធម៌» ដែលរៀបចំកម្មវិធីដោយ កាកបាទក្រហមកម្ពុជា តាមប្រព័ន្ធអនឡាញ(Zoom) សម្រាប់សាខាកាកបាទក្រហមកម្ពុជា ទាំង២៥ រាជធានី-ខេត្ត ក្រោមអធិបតីភាពឯកឧត្តម ពិត ចំណាន រដ្ឋលេខាធិការក្រសួងអប់រំ យុវជន និងកីឡា និងជា សមាជិកគណៈកម្មាធិការកណ្តាល កាកបាទក្រហមកម្ពុជា ដែលថ្លែងដោយ ឯកឧត្តម ជួន កក្កដា អនុរដ្ឋលេខាធិការ ក្រសួងធម្មការ និងសាសនា ។

គុណធម៌ និងចរិយាធម៌ គឺជាគោលការណ៍គ្រឹះពីរដែលមិនអាចកាត់ផ្តាច់បានក្នុងការកសាងសង្គមមួយឱ្យមានភាពថ្លៃថ្នូរ។ គុណធម៌ ជាសភាវប្រសើរជាងសភាវធម្មតា ដែលឆ្លុះបញ្ចាំងតាមអំពើ និងសកម្មភាពល្អរបស់មនុស្ស ដោយសេចក្តីសុចរិតឥតព្រំដែនទៅលើមនុស្សទូទៅ ជាឧត្តមគតិប្រកបដោយគតិបណ្ឌិតមានតម្លៃខ្ពស់មិនអាចកាត់ថ្លៃបាន។ ចរិយាធម៌ គឺជាការប្រព្រឹត្ត ការប្រតិបត្តិ អាកប្បកិរិយា និងគោលការណ៍ណែនាំទាំងឡាយណាដែលបង្ហាញពីភាពត្រឹមត្រូវ សមរម្យ ស្របតាមសីលធម៌ សុជីវធម៌ និងតម្លៃក្នុងសង្គម ដែលយើងទាំងអស់ត្រូវគោរពប្រតិបត្តិតាម ។